iute Albania drejt së ardhmes digjitale: maksimizimi i produktivitetit me Microsoft Copilot

Në epokën e Inteligjencës Artificiale, kompanitë që përqafojnë teknologjitë e reja janë ato që arrijnë të udhëheqin tregun dhe të krijojnë standarde të reja për të ardhmen. iute Albania, pjesë e grupit bankar digjital iute Group, ka dëshmuar edhe një herë vizionin e saj të qartë për të qenë pionier në transformimin digjital, duke investuar në një trajnim intensiv 3-ditor mbi përdorimin e platformës AI Microsoft Copilot për disa nga menaxherët e kompanisë.

Trajnimi u fokusua në mënyrat praktike se si Inteligjenca Artificiale mund të përmirësojë produktivitetin, efikasitetin dhe cilësinë e punës së përditshme. Ky program u realizua në bashkëpunim me Alb Academy, një partner i përkushtuar ndaj zhvillimit të bizneseve përmes teknologjive moderne dhe inovacionit. Ky bashkëpunim shënon një tjetër hap të rëndësishëm drejt modernizimit të sektorit financiar dhe forcimit të kulturës digjitale brenda kompanisë.

Programi i trajnimit u zhvillua me metodologjinë “Learn by Doing”, ose e thënë ndryshe, “Mësojmë duke provuar”, duke vendosur theksin te praktika dhe aplikimi real i AI në proceset e përditshme të punës. Gjatë ditës së parë, pjesëmarrësit u njohën me konfigurimin e Copilot si një asistent strategjik, automatizimin e raporteve dhe transformimin e tyre në prezantime profesionale. Në ditën e dytë, fokusi u zhvendos te analiza inteligjente e të dhënave në Excel pa përdorimin e formulave komplekse, krijimi i grafikëve me ndihmën e AI, si dhe rritja e efikasitetit në Teams dhe Outlook përmes përmbledhjes automatike të takimeve dhe hartimit të e-mail-eve profesionale. Trajnimi përfundoi me simulime dhe zgjidhje të skenarëve realë nga përditshmëria e menaxherëve, duke përdorur teknikat e “Advanced Prompting”, pra formulimin e avancuar të instruksioneve për platformat AI. Përmes këtij procesi, menaxherët mësuan si të komunikojnë në mënyrë më të qartë dhe strategjike me Inteligjencën Artificiale, për të marrë rezultate më të sakta, më kreative dhe më efektive.

Përtej aspektit teknik, ky trajnim përfaqëson një hap konkret drejt një kulture pune më moderne dhe më inovative. Synimet kryesore të këtij investimi lidhen me përshpejtimin e vendimmarrjes, kursimin e kohës në detyrat rutinë si raportimet apo komunikimi i përditshëm, si dhe standardizimin e proceseve dhe komunikimit në një nivel më profesional dhe konsistent.

Në një realitet ku teknologjia po evoluon me ritme të shpejta, aftësia për t’u përshtatur dhe për të mësuar vazhdimisht bëhet një avantazh i rëndësishëm konkurrues. Për këtë arsye, investimi në zhvillimin e stafit dhe integrimin e zgjidhjeve inteligjente mbetet një prioritet për ne. Në iute Albania, Inteligjenca Artificiale shihet jo vetëm si një mjet për të rritur efikasitetin, por si një partner strategjik që fuqizon vendimmarrjen, inovacionin dhe lidershipin. Integrimi i Microsoft Copilot është një dëshmi e qartë e ambicies së kompanisë për të qenë gjithmonë një hap përpara, duke përdorur teknologjitë më të avancuara në funksion të rritjes, zhvillimit dhe përmirësimit të vazhdueshëm të eksperiencës së punës.